Tuesday, November 24, 2009
အမေဟာ အမေပါ
အရဟန္တဓာတ် ကိန်းဝပ်တော်မူသွားတဲ့ အရှင် ၀ိမလကောဏ္ဍညမထေရ်ဟာ သူ့ဘ၀ဖြစ်စဉ်အကျဉ်း လို့ပဲပြောပြော၊သူ့ရဲ့ဟောကြားချက်တရားလို့ပဲ ဆိုဆို၊ သူရဲ့ ရဲ၇ဲတောက် ဖွင့်ဟ၀န်ခံချက်လို့ပဲ သုံးသုံး ရိုးရိုးရှင်းရှင်း ပွင့်ပွင့်လင်းလင်း မိန့်ကြားသွားခဲ့တာပါ။
မိမိသည်သရက်ပင်ကို အစွဲပြု၍ ခေါ်ဝေါ်အပ်သော မိခင်၏ ၀မ်းတွင်း၌ သန္ဓေ တည် ဖွားမြင်ခဲ့သူ ဖြစ်ပါသည်။အ၀တ်ဖြူကို တံခွန်တင်ထားသော လူ့တံခွန် လူ့ထိပ် အဘိသိက်ခံ မင်းသည် မိမိ၏ ဖခမည်းတော် ဖြစ်ပါသည်။ယခုအချိန်၌ မိမိသည် မောက်မာ ထောင်လွှားတတ်သည့် မာနတံခွန်ကို အပြီးတိုင် ရုပ်သိမ်း ချထားပြီးဖြစ်ပါသည်။အရိယာတို့၏ ဥစ္စာဖြစ်သော ပညာတံခွန်ကို လွှင့်တင်လျက်သာ နေသူဖြစ်ပါသည်။ မဟာ ကေတုခေါ် ကိလေသာတံခွန်ကို အကင်းမဲ့ ချေဖျက်ပြီးဖြစ်ပါသည်။ ဤသည်မှာ မိမိ၏ ဘ၀အကြောင်း တစ်စိတ်တဒေသပင် ဖြစ်ပါတော့သည်။
အမေဟာ အမေပါ
အရှင်ဝိမလကောဏ္ဍည မထေရ်မြတ်ဟာ ပထမဆုံး မိခင်ရဲ့ မျိုးရိုးဇာတိကို ထုတ်ဖော်မိန့်ကြားလိုက် ပါတယ်။သရက်ပင်ခွကြား၌ ဖြစ်ပေါ်လာရသောကြောင့်သရက်ပင်ကို အစွဲပြု၍ အမ္ဗပါလီမည်သော မိခင်၏ ၀မ်းတွင်း၌ သန္ဓေတည်လျက် မွေးဖွားကြီးပြင်းလာရသူ ဖြစ်ပါသည် တဲ့။
လူတော်တော်များများဟာ အမျိုးဇာတ်ကို အရေးထားကြပါတယ်။အမျိုးဇာတ်နှင့် မာန်ဝင့်ကြပါတယ်။ အမျိုးဇာတ်ကို အမွှမ်းတင်ကြပါတယ်။ အမျိုးဇာတ် ညံ့တာ ကို ကဲ့ရဲ့ကြပါတယ်။ အမနာပပြောကြပါတယ်။ဒါကြောင့် တစ်ချို့ အမျိုးညံ့သူလို့ သတ်မှတ်ခံထားရသူများဟာ ကိုယ့် မျိုးရိုးကို လူကြားသူကြားထဲမှာ ထုတ်ဖော်မပြောရဲကြပါဘူး၊ လူအများသိသွားမှာကို မလိုလားကြပါဘူး။ထိတ်လန့် ကြောက်ရွံ့ ကြပါတယ်။
အရှင်ဝိမလကောဏ္ဍညမထေရ်ဟာ မိခင်ဖြစ်သူ ရဲ့ ဇာစ်မြစ်ကို ရဲရဲဝံ့ဝံ့ ထုတ်ဖော်လိုက်ပါတယ်။ ရဟန္တာ ဖြစ်သွားလို့ ချီးမွမ်းမှု ကဲ့ရဲ့မှုတွေကို မတုန်လှုပ်တော့ တာလည်းတစ်ကြောင်းပါ၊ ဘယ်လိုအခြေအနေမျိုးပဲရှိရှိ ကိုယ့်မိခင်ရဲ့ အမည်နာမ မျိုးရိုးဇာတိတွေကို ဂုဏ်ယူ ၀င့်ကားစွာ ထုတ်ဖော်ပေးကြပါလို့ နမူနာ စံပြဖြစ်စေချင် တာလည်းတစ်ကြောင်း ပါနိုင်ပါတယ်။
အရှင်ဝိမလကောဏ္ဍညမထေရ်ရယ်လို့ မဖြစ်ခင် ၀ိမလမင်းသားဘ၀မှာထဲက မိခင်ကို လေးစားမြတ်နိုးခဲ့ တာပါ။ချစ်ခင်အားကိုးခဲ့တာပါ။မောပန်းနွမ်းနယ်လာရင် မှေးစက်ခိုနားရာအဖြစ်၊ဆာလောင်မွပ်သိပ်လာရင် ဆာလောင်မှုကို ဖြေဖျောက်ပေးသူအဖြစ်၊မကျန်းမမာ ဖြစ်လာရင် ဆေးကုပေးသူအဖြစ်၊ပြဿနာတစ်ခုဖြစ်လာရင် ဖြေရှင်းပေးသူအဖြစ်၊နားမလည်လို့ မေးမြန်းလာရင် ဗဟု သုတပေးသူအဖြစ် အစစအရာရာ ဖြည့်ဆည်းပေးခဲ့လို့ လည်း ကျေးဇူးရှင်အစစ်လို့ မှတ်ယူထားခဲ့တာပါ။
ဘယ်သူပဲဖြစ်ဖြစ် အမေ(အဖေ)နဲ့ သား (သမီး) ကားမှာ ဘာဂုဏ်ဒြပ်မှ မခြားသင့်ပါဘူး။
တခြားသူတွေအတွက် မျိုးရိုးညံ့သူ ဖြစ်ပါစေ သား(သမီး)အတွက်တော့ အမေဟာ အမေပါပဲ။
အလုပ်ရှင်အတွက် အလုပ်သမဖြစ်ပါစေ သား (သမီး)အတွက်တော့ အမေဟာ အမေပါပဲ။
ဧည့်သည်အတွက် ပြည့်တန်ဆာဖြစ်ပါစေ သား (သမီး)အတွက်တော့ အမေဟာ အမေပါပဲ။
တရားရုံးအတွက် တရားခံဖြစ်ပါစေ သား(သမီး) အတွက်တော့ အမေဟာ အမေပါပဲ။
လင်ယောက်ျားမရှိ ကွယ်လွန်^ကွဲကွာနေလို့ မုဆိုးမ^တစ်ခုလပ်ဖြစ်ပါစေ သား(သမီး)အတွက်တော့ အမေဟာ အမေပါပဲ။
တိုင်းပြည်အုပ်ချုပ်ရတဲ့ သမ္မတ ၀န်ကြီးချုပ် ဖြစ်ပါစေ သား(သမီး)အတွက်တော့ အမေဟာ အမေပါပဲ။
သား(သမီး)ဟာ အမေကို အမျိုးညံ့သူ(ဖြစ်ဦး တော့) မမြင်ရပါဘူး။
သား(သမီး)ဟာ အမေကို ပြည့်တန်ဆာလို့ (ဖြစ် ဦးတော့) မမြင်ရပါဘူး။
သား(သမီး)ဟာ အမေကို တရားခံလို့ (ဖြစ်ဦးတော့) မမြင်ရပါဘူး။
သား(သမီး)ဟာ အမေကို မုဆိုးမတစ်ခုလပ်လို့ (ဖြစ်ဦးတော့) မမြင်ရပါဘူး။
သား(သမီး)ဟာ အမေကို သမ္မတ ၀န်ကြီးချုပ် လို့ (ဖြစ်ဦးတော့) မမြင်ရပါဘူး။
သားက အမေကိုအမေလို့မြင်ရသလို အမေ ကလည်း သားကို သားလို့ပဲ မြင်ရမှာပါ။
ငါ့သားက သူဌေးဟဲ့၊ ငါ့သားကတော့ ငမွဲပဲ၊ ငါ့သားက ပညာတတ်ဟဲ့၊ ငါ့သားကတော့ ပညာမဲ့ပဲ၊ ငါ့သားက အရာရှိကြီးဟဲ့၊ ငါ့သားကတော့ ခိုင်းဖတ်ပဲ၊ ဆိုတဲ့ အမြင်မျိုးတွေတစ်ခုမှ မမြင်ရပါဘူး။
ဒါဆိုရင် သားနဲ့ အမေကြားမှာ အဆီးအတား အားလုံး ပျောက်ကွယ်သွားပြီး တစ်စိတ်တစ်ဝမ်းထဲ ဖြစ်သွားပါတယ်။ အမ္ဗပါလီနဲ့ ၀ိမလမင်းသားတို့ သားအမိ ဟာ အဲဒီလို သားအမိဖြစ်ပါတယ်။
ဒါက သားနဲ့အမေအဖြစ် တည်ရှိစဉ်အခါက အပြန်အလှန်စိတ်ဓာတ်ဖြစ်ပါတယ်။
ဝိမလမင်းသား ရဟန်းဖြစ်သွားပြီးတဲ့ နောက် ပိုင်းမှာတော့ သားဟာ သားမဟုတ်တော့ပဲ ဘေးထွက် ဆိုးကျိုးမရှိတဲ့ အားဆေးတစ်မျိုးဖြစ်သွားပါတယ်။အမေဟာ အမေမဟုတ်တော့ပဲ ကျေးဇူးရှင်မယ်တော် ဖြစ်သွားပါတယ်။
အရှင်ဝိမလကောဏ္ဍညမထေရ်ဟာ ရှေးအခါ လူ့ဘ၀ရှိစဉ်ကာလကလည်း သူ့အမေ အမ္ဗပါလီကို အမေလို့ပဲ မြင်ခဲ့တဲ့သူပါ။သာသနာတော်ဝင်ရောက်ပြီး နောက်ပိုင်းမှာလည်း မယ်တော်အမ္ဗပါလီကို မယ်တော် လို့ပဲ မြင်ခဲ့တဲ့သူဖြစ်ပါတယ်။ ခြားနားတာက လူ့ဘ၀ အမေလို့ပဲ မြင်စဉ်အခါက အချစ်ခေါ်တဲ့ တဏှာလောဘ စိတ်နဲ့ အမေလို့ မြင်ခဲ့တာပါ။ ရဟန်းဘ၀ရောက် ရဟန္တာဖြစ်ပြီးနောက်မှာတော့ အချစ်မပါ ကျေးဇူးရှင် အစစ်လို့သိတဲ့ ဥာဏ်ပညာနဲ့ပဲ မယ်တော်လို့မြင်ခဲ့တာပါ။ ဒါကြောင့် အမေဟာ အမေပါပဲ လို့ စံပြတစ်ခုအနေနဲ့ ဖွင့်ဟ မိန့်ကြားတော်မူလိုက်တာပါ။
သားသမီးတိုင်း အမေဆိုတာရှိကြပါတယ်။ ဒါပေ မယ့် အမေတွေဟာ အသက်မွေးဝမ်းကျောင်းပြုတာချင်း တော့ မတူကြပါဘူး၊ ဆင်းရဲချမ်းသာချင်းတော့ မတူကြပါ ဘူး၊ မျိုးရိုးဗီဇ မတူကြပါဘူး။အသိပညာ မတူကြပါဘူး၊ တူတာကတော့ သားသမီးတွေအပေါ်မှာ စူးစူးရှရှချစ်တာပါ ၊ မတူတာကို ဖယ်ထားပြီး တူတာကိုပဲ ယူလိုက် မယ်ဆိုရင် အမေဟာ အမေပါပဲဆိုတာ ပေါ်လွင်လှ ပါတယ်။
အမေကြောင့် သားမှာ ဂုဏ်ငယ်စရာ၊နိမ့်ကျ စရာ မရှိပါဘူး၊သားဖြစ်သူကလည်း အမေကြောင့် ငါ ဂုဏ်ငယ်ရတယ် အတွေးမျိုး လုံးဝမ၀င်ရပါဘူး၊ ဘာဖြစ်လို့လဲဆိုတော့ အမေဟာ အမေဖြစ်လို့ပါ
တကယ်တော့လည်း“ အမေဟာ အမေပါ ပဲလေ”
No comments:
Post a Comment